股市近排都跌咗几千点 日日睇报纸都会见到二手减价

当之前个个发展商都话加息无影响，贸易战又话唔关香港事，供应多又话需求更多，但事实就系，呢几个月市场不断出现二手减价、新盘滞销、就连山顶地王都要流标，咁系唔系真系无影响先?

其实自从6月林郑公布娥六招之后，碰巧中美贸易战都不停升级，股市近排都跌咗几千点，日日睇报纸都会见到二手减价，细屋苑业主一向持货能力比较差，减价一、二百万已经湿湿碎，笔者有听闻，部份中半山豪宅业主，本身叫价已经比楼上楼下平两成，近排见成区都无乜成交，一于再减，再劈成2000万求甩货，减完之后叫价足足比楼上楼下平咗成4000万，如果用金额计，都可能系近期减得最多慨单位。

新盘又点睇先?之前好多人话，新盘有好多付款方法，又长成交又高成数按揭，所以个价钱高少少都大把人抢住买，但系呢，近排好几个新盘，推出以来的卖得唔太好，好似筲箕湾个逸瑆咁，第一日卖完5间就无咗影，减价再卖都系卖多6间，后尾仲有一间挞埋订。九龙区呢?鲤鱼门个盘讲到自己有几瞩目，但第一日推130个单位，卖得40几间，即晚仲系咁甩单。扫管笏个上源又点?虽然头日轮三百几间好威咁卖清光，但第二轮即刻卖得一半左右，临尾仲有成十粒挞订。

咪以为剩系小市民小业主先至睇淡，上星期招标慨文辉道地皮，招标慨时间好威水，有人仲吹到渠市值400几亿，不过到截标时，得5个财团入标，其中一个仲要有成六份人夹，反应都已经麻麻，谁不知最终仲流埋标。虽然有发展商就话同个市唔太关事，只系空置税计唔掂数，但系都有人讲，话呢几个星期个市变化太大，发展商出价同政府心目中口价有距离所以流标，咁系唔系即系暗示有部份发展商对后市睇法已经无之前咁好?

不过咁，讲到个市有几差，你睇啱啱截止慨居屋，收成25万份表，成50几个人去抢一个单位，即系话香港人其实都仲系好想买楼，只系会唔会喺呢一刻用咁慨价钱买咁解，所以都有人话，「跌还跌，唔会跌得好多，平少少都大把人冲入市啦」。